Umumiy ajdod gipoteza — Yer yuzidagi barcha tirik organizmlar bitta umumiy ajdoddan / umumiy genofonddan kelib chiqqani haqidagi postulat. Uning asl ko‘rinishini Darvin “Turlarning kelib chiqishi” va “Insonning kelib chiqishi” asarlarida taklif qilgan. Zamonaviy evolyutsion biologiyada Yer yuzidagi butun hayot “so‘nggi universal umumiy ajdod” (LUCA) deb ataladigan organizmlar populyatsiyasidan kelib chiqqani taxmin qilinadi.

Ushbu gipotezani qo‘llab-quvvatlaydigan asosiy faktlar: genetik kodning universalligi, biokimyoviy mexanizmlarning bir xilligi hamda molekulyar ma’lumotlar asosida qayta tiklangan universal filogenetik daraxtdir.

Dalillar

Umumiy biokimyo va genetik kod

Ma’lum bo‘lgan hayotning barcha shakllari biokimyoning bir xil fundamental tashkiliga asoslanadi: DNKda kodlangan genetik axborot oqsil va RNK fermentlari ta’sirida RNKga transkripsiya qilinadi, so‘ng ribosoma yordamida oqsillarga translyatsiya qilinadi; bunda ATF, NADN va boshqa energiya manbalari ishlatiladi. Bundan tashqari, genetik kod deyarli barcha hayot shakllari — bakteriyalardan tortib odamlargacha — uchun amalda bir xil. Kodning o‘xshashligi biologlar tomonidan odatda umumiy ajdod nazariyasining yakuniy dalili sifatida ko‘riladi. Genetik koddagi kichik farqlarni tahlil qilish ham nazariyani qo‘llab-quvvatlovchi dalillarni taqdim etgan.