| Tailwind CSS | |
|---|---|
| | |
| Turi | CSS freymvorki va ochiq kodli dasturiy ta’minot |
| Mualliflari | Adam Ueten, Jonatan Reynink, Devid Hemfill va Stiv Shoger |
| Ishlab chiquvchi | Tailwind Labs |
| Dasturlash tillari | TypeScript, Rust, CSS |
| Operatsion tizim | turli platformalarda ishlaydi |
| Interfeys tillari | Ingliz tili |
| Chiqarilgan sana | 13-may 2019 |
| Apparat platformasi | Butunjahon o‘rgimchak to‘ri |
| So‘nggi versiya | 4.1.2 (2025-04-03) |
| Kod repozitoriysi | github.com/tailwindlabs/… |
| Litsenziya | MIT litsenziyasi |
| Veb-sayti | tailwindcss.com |
Tailwind CSS — CSS freymvorki bo‘lib, uning manba kodi ochiq. Uni Adam Ueten yaratgan, Tailwind Labs esa qo‘llab-quvvatlaydi. Ushbu kutubxonaning o‘ziga xos jihati shundaki, u alohida elementlar uchun CSS sinflarini oldindan belgilab qo‘ymaydi. Buning o‘rniga har bir elementning ko‘rinishini sozlash uchun birlashtirib ishlatish mumkin bo‘lgan yordamchi sinflarni taqdim etadi.
30-may 2024-yil holatiga ko‘ra, Tailwind CSS 79 mingdan ortiq yulduzni GitHub platformasida to‘plagan. Bu uni eng ommabop CSS freymvorklaridan va GitHub repozitoriylaridan biriga aylantiradi.
Yordamchi sinflar (utility classes)
“Avval yordamchi sinflar” (utility-first) tamoyili — Tailwind’ning asosiy xususiyati. Tailwind CSS’da muayyan elementlar (tugma, panel, menyu, matn kiritish maydoni va h. k.) uchun maxsus sinflar mavjud emas. Tailwind CSS’dagi har bir sinf elementning muayyan xususiyatini — rangini, shriftini, o‘lchamini, joylashuvini, effektlarini va h. k.) belgilaydi.
Masalan, boshqa bir kutubxonadan foydalanilganda elementga message-warning sinfi berilishi mumkin; bu sinf unga sariq fon va qalin shrift belgilaydi. Tailwind CSS’da xuddi shunday natijaga erishish uchun elementga quyidagi sinflar to‘plamini berish kerak:
JIT kompilyatsiyasi
JIT rejimi (Just-In-Time, ya’ni “ayni kerakli paytda”) — dastur ishlab chiqish jarayonida CSS kodini juda tez kompilyatsiya qilish usuli. Uslublar faqat zarur bo‘lganda yaratilgani sababli mahsulotning yakuniy versiyasini tayyorlash bosqichida ishlatilmaydigan uslublarni olib tashlashga ehtiyoj qolmaydi. Demak, dasturchi ishlab chiqish vaqtida ham, yakuniy yig‘ish jarayonida ham aynan bir xil CSS kodini oladi.
Tailwind CSS’ning uchinchi versiyasidan boshlab JIT rejimi sukut bo‘yicha qo‘llanadi.
Sozlamalar va mavzular
Tailwind taqdim etadigan yordamchi sinflar va ularning variantlarini odatda tailwind.config.js deb nomlanadigan konfiguratsiya fayli orqali sozlash mumkin. Unda yordamchi sinflarning qiymatlari, masalan, ranglar palitrasi yoki elementlar atrofidagi bo‘shliqlar o‘lchamlari belgilanishi mumkin.
Versiyalar
Tailwind CSS versiyalar o‘rtasidagi moslikni aniqlash uchun semantik versiyalashdan, shuningdek, o‘zgarishlarni bosqichma-bosqich joriy etish strategiyasidan foydalanadi. Bu dasturchilarga yangiliklarni dastlabki bosqichdayoq o‘rganish va kelajakda yangilanish bilan bog‘liq muammolarning oldini olish imkonini beradi.