LTE Advanced mobil interneti

LTE Advanced — mobil aloqa standarti. LTE Advanced 3GPP tomonidan Long Term Evolution (LTE) standartining asosiy takomillashtirilgan versiyasi sifatida standartlashtirilgan.

2009-yil oxirida rasman Xalqaro elektraloqa ittifoqining elektraloqani standartlashtirish sektoriga 4G tizimi uchun nomzod sifatida taqdim etildi. LTE Advanced Xalqaro elektraloqa ittifoqi (ITU) tomonidan tasdiqlandi va 3GPP tomonidan 2011-yil mart oyida yakuniy shaklga keltirildi.

LTE-Advanced texnologiyasi WiMAX 2 bilan birga to‘rtinchi avlod 4G simsiz aloqa standarti sifatida 2012-yilda Jenevada bo‘lib o‘tgan konferensiyada Xalqaro elektraloqa ittifoqi tomonidan rasman e’tirof etildi.

LTE-Advanced — bu 3GPP spetsifikatsiyasining 10-reliziga berilgan nom. Xalqaro elektraloqa ittifoqi unga «IMT-Advanced» sertifikatini bergan. Bu to‘rtinchi avlod tarmoqlarining rasmiy maqomini bildiradi. LTE’ning oldingi versiyalari 4G texnologiyasi hisoblanmaydi.

Tarixi

LTE texnologiyasi 3GPP konsorsiumi qabul qilgan dastlabki standart — 3GPP 8-relizi paydo bo‘lganidan buyon bir necha rivojlanish bosqichini bosib o‘tdi. Texnologiyaning ishlash ko‘rsatkichlarini yanada yaxshilash va imkoniyatlarini kengaytirish maqsadida 2008-yil aprel oyida 3GPP konsorsiumi 10-reliz ustida ish boshladi. Asosiy vazifalardan biri LTE texnologiyasini Xalqaro elektraloqa ittifoqi 4G uchun belgilagan IMT-Advanced standarti talablariga to‘liq moslashtirish edi. Bu LTE’ni to‘laqonli 4G texnologiyasi deb atash imkonini berardi.

LTE-Advanced chastota polosasini kengaytirish, spektrdagi bir nechta chastota polosalarini (jumladan, bir-biriga tutash bo‘lmaganlarini ham) birlashtirish, ko‘p antennali MIMO orqali ma’lumot uzatish imkoniyatlarini kengaytirish, LTE signalini retranslyatsiya qilish hamda geterogen tarmoqlarni (HetNet) joriy etishni nazarda tutadi.

9-oktabr (2012-yil) kuni Yota Rossiyada birinchi bo‘lib tijoriy tarmoqda LTE-Advanced mobil aloqa texnologiyasini ishga tushirdi. Bunda 11 ta baza stansiyasidan foydalanildi.

25-fevral (2014-yil) kuni MegaFon Moskvaning Sadovoye koltso hududida abonentga ma’lumot yuklab olish tezligi 300 Mbit/s gacha, abonentdan uzatish tezligi esa 50 Mbit/s gacha bo‘lgan LTE-Advanced tarmog‘ini ishga tushirdi va uni marketing maqsadida 4G+ deb atadi.

5-avgust (2014-yil) kuni Beeline Moskvada 2 ta diapazonni — Band 7 (2,6 GGts) va Band 20 (800 MGts) — birlashtirgan, abonentga ma’lumot yuklab olish tezligi 115 Mbit/s gacha yetadigan LTE tarmog‘ini ishga tushirdi.

Havolalar

Resurslar