
To‘lqin fronti (to‘lqin sirti) — to‘lqin tarqalishi tufayli yuzaga kelgan tebranishlar bir xil fazada sodir bo‘ladigan muhit nuqtalarining geometrik o‘rnidir. Agar tarqalayotgan qo‘zg‘alish vaqt (demak, fazo) bo‘yicha cheklangan bo‘lsa, to‘lqin fronti deb to‘lqin jarayoni muayyan vaqtga qadar yetib kelgan sirtga, ya’ni muhitning qo‘zg‘algan va qo‘zg‘almagan sohalari orasidagi chegaraga ham aytiladi.
Bu tushuncha turli tabiatga ega sinusoidal to‘lqinlarga, masalan, elektromagnit yoki elastik to‘lqinlarga nisbatan qo‘llanadi. To‘lqin frontining shakliga ko‘ra eng sodda to‘lqinlar quyidagi turlarga ajratiladi: sferik (nuqtaviy manbadan tarqaladigan), yassi (tovush to‘lqini uchun tebranayotgan plastinka kabi yassi manbadan, bir o‘lchamli tizimlarda — uzatish liniyalari va to‘lqin o‘tkazgichlarda — yoki nuqtaviy manbadan uzoqda hosil bo‘ladigan), silindrik (ipsimon manbadan yoki ikki o‘lchamli tizimdagi nuqtaviy manbadan, masalan, suv havzasi yuzasidagi to‘lqin kabi hosil bo‘ladigan). To‘lqin tarqalishi jarayonida uning shakli o‘zgaradi. Masalan, yassi yorug‘lik to‘lqini linzadan o‘tganda, to‘lqin fronti sferik shaklga kiradi (animatsiyaga qarang).
Agar to‘lqin amplitudasi to‘lqin frontining barcha nuqtalarida bir xil bo‘lsa, to‘lqin bir jinsli hisoblanadi. To‘lqin sirtiga perpendikulyar bo‘lgan chiziq nur yoki to‘lqin normali deb ataladi.